కెమెరా.. కరకరా...

అనగనగా ఒక ఫొటోగ్రాఫర్‌. వన్యప్రాణుల ఫొటోలు తీయడం మహా ఇష్టం. కెన్యాలోని మసాయ్‌ మారా జాతీయ పార్కుకు వెళ్లారు. దాదాపు లక్ష రూపాయల విలువైన కెమెరాను ట్రైపాడ్‌కు అమర్చి... తాను దూరంగా నిలబడి... రిమోట్‌ ద్వారా ఆడ సింహాల ఫొటోలు తీస్తున్నాడు. సింహాల దృష్టి కెమెరాపై పడింది. కెమెరా దగ్గరికి వచ్చి ఎగాదిగా చూశాయి. ఒక చిలిపి సింహం... కెమెరాను నోట్లో పెట్టుకుంది. దానిని కరకరా నమిలింది. ‘ఇదేదో మనకు పనికొచ్చే సరుకు కాదు’ అని వదిలేసింది. కెమెరాలో అత్యంత ముఖ్యమైన లెన్స్‌, ముందు భాగం డ్యామేజ్‌! ‘డబ్బా’ మాత్రం మిగిలింది. సింహం ఇలా కెమెరాను ‘నమిలేస్తున్న’ చిత్రాలను థామస్‌ సెలిజ్‌ అనే ఫొటోగ్రాఫర్‌ తీశారు. ‘కెమెరా పోయింది’... అని దాని ఓనర్‌ ఏడుపు! ‘నా ఫొటోలు భలే వచ్చాయ్‌’ అని థామస్‌ సంబరం! ఎవరి బాధ వారిది మరి!