‘చిన్నారి పెళ్లికూతురు’ సీరియల్ అభిమానులకు చేదువార్త !

కలర్స్ ఛానెల్‌లో ప్రసారమవుతున్న ‘బాలికా వధూ’ ధారావాహిక ప్రేక్షకులను ఎంతగానో అలరిస్తున్న సంగతి తెలిసిందే. తెలుగులో ఈ సీరియల్‌ను ‘చిన్నారి పెళ్లి కూతురు’ పేరుతో ప్రసారం చేస్తున్నారు. సమాజంలో ఒకప్పటి సాంఘిక దురాచారమైన బాల్య వివాహం నేపథ్యంలో ఈ సీరియల్‌ను తెరకెక్కించారు. బుల్లి తెర ప్రేక్షకులను ఎంతగానో అలరిస్తున్న ఈ సీరియల్‌కు జూలై 31న ముగింపు పలికేందుకు నిర్మాతలు సిద్ధమయినట్లు తెలుస్తోంది. దాదాపు 8 సంవత్సరాలుగా సీరియల్ అభిమానులను ఆలోచింపజేస్తూ సాగిన కథ ఇక ముగిసిపోనుంది. జూలై 22న ‘చిన్నారి పెళ్లి కూతురు’ సీరియల్ చివరి షూట్ జరగనుందని టాక్. అయితే అధికారికంగా ఇప్పటి వరకూ ఎలాంటి ప్రకటన వెలువడలేదు. ఈ సీరియల్ మొదలైనప్పుడు ఆనందిగా అలరించిన అవికా ఇప్పుడు పెరిగిపెద్దయి సినిమాల్లో కూడా నటించడం విశేషం.