ట్యూషన్ విద్యార్థినిపై రెండేళ్ళుగా టీచర్ అత్యాచారం

జమ్మూ: ట్యూషన్‌కు వచ్చే ఓ విద్యార్థిపై రెండేళ్ళుగా అత్యాచారానికి పాల్పడుతున్న టీచర్‌ను పోలీసులు అరెస్ట్ చేశారు. జమ్మూకశ్మీర్‌లోని ఆర్ఎస్ పురాకు చెందిన బోధ్ రాజ్ 2014 నుంచి ట్యూషన్‌కు వచ్చే ఓ విద్యార్థిని లైంగికంగా వేధిస్తున్నాడు. ఈ విషయాన్ని ఎవరికైనా చెబితే చంపేస్తానని ఆమెను భయపెట్టాడు. రెండేళ్ళకు ధైర్యం చేసిన ఆ బాలిక తన తల్లికి జరిగిదంతా చెప్పింది. దీంతో ఆమె పోలీసులకు ఫిర్యాదు చేయడంతో బాలికకు వైద్య పరీక్షలు నిర్వహించి నిర్థారించారు. అనంతరం ఆ కీచక టీచర్‌ను అరెస్ట్ చేశారు.

 

ఆ ఉపాధ్యాయుడికి గతంలో నేర చరిత్ర ఉందని పోలీసులు చెబుతున్నారు. 1999లో ఓ మహిళతో వివాహేతర సంబంధం పెట్టుకున్న బోధ్ రాజ్, వారిద్దరు కలిసి ఆమె భర్తను హత్య చేశారు. ఈ కేసులో పదేళ్ళ జైలు శిక్ష కూడా అనుభవించారు. 2012లో జైలు నుంచి విడుదలయ్యాక ఇద్దరు కలిసి జీవించారు. ఆ తర్వాత ఆ మహిళ అనుమానస్పదంగా మృతి చెందింది. దీంతో ఆర్ఎస్ పురాకు వచ్చి ట్యూషన్ సెంటర్ పెట్టాడు. బోధ్ రాజ్ గత నేర చరిత్ర తెలియడంతో అతడు మరింత మంది విద్యార్థినులపై అత్యాచారాలకు పాల్పడి ఉంటాడని, వారు భయంతో నోరువిప్పడం లేదని పోలీసులు అనుమానిస్తున్నారు.